Құқықтық құжаттар

Қызмет көрсету шарттары

Соңғы жаңартылған күні: 2026 жылғы 25 қыркүйек

1. Осы Шарттар туралы

1.1. Осы Қызмет көрсету шарттары («Шарттар») @voicy мекенжайы бойынша қолжетімді Voicy Telegram-ботын («Сервис» немесе «Бот») пайдалану тәртібін реттейді. Сервисті Қазақстан Республикасында тіркелген жауапкершілігі шектеулі серіктестік AI Creator LLP (ТОО «AI Creator») («біз», «бізді», «біздің») басқарады.

1.2. Ботты іске қосу («Start» батырмасын басу) немесе оның кез келген функциясын пайдалану арқылы сіз осы Шарттарды қабылдайсыз. Келіспесеңіз, Сервисті пайдаланбаңыз. Жазылымға ақы төлеген жағдайда төлем де Шарттарды қабылдағаныңызды растайды.

1.3. Сервисті пайдалану үшін сіз кемінде 18 жаста немесе, егер еліңізде кәмелетке толу жасы бұдан жоғары болса, сол жаста болуыңыз тиіс.

1.4. Біздің Құпиялылық саясатымызда дербес деректеріңізді қалай өңдейтініміз түсіндірілген. Ол Бот мәзірінде қолжетімді және осы Шарттардың ажырамас бөлігі болып табылады.

2. Сервис

2.1. Voicy жасанды интеллектіні мына мақсаттарда пайдаланады:

• дауыстық хабарларды, аудио және бейне файлдарды, сондай-ақ үшінші тарап платформаларына (YouTube, TikTok және Instagram сияқты) сілтемелер бойынша медианы мәтінге айналдыру;
• түйіндер мен конспектілер жасау және мәтінді басқа тілдерге аудару;
• сіз жіберген бейнелерден, GIF-тен, стикерлерден және суреттерден Telegram бейнехабарларын («дөңгелектерді») жасау;
• inline режимі (@voicy) арқылы кез келген чатқа дауыстық мемдер жіберуге мүмкіндік беру;
• Бот интерфейсінде қолжетімді өзге функцияларды ұсыну.

2.2. Нәтижелер Бот хабары түрінде немесе Word (.docx), PDF, TXT немесе Markdown (.md) форматындағы файл ретінде берілуі мүмкін.

2.3. Кейбір функциялар біз белгілеген лимиттер шегінде тегін. Ақылы функциялар жазылым («Voicy Pro») бойынша қолжетімді. Біз функциялар мен лимиттерді кез келген уақытта өзгертуге, қосуға немесе алып тастауға құқылымыз.

2.4. «Контент» — сіз Сервиске жіберетін кез келген файлдар, дауыстық хабарлар, мәтін, сілтемелер және өзге материалдар. «Нәтиже» — Сервис сіздің Контентіңіз негізінде жасайтын кез келген нәрсе (транскрипттер, түйіндер, аудармалар, бейнехабарлар және т.с.с.).

3. Жазылым және төлем

3.1. Қолданыстағы тарифтер, бағалар және төлем кезеңдері төлем алдында Ботта көрсетіледі.

3.2. Төлемдерді Paddle.com Market Limited («Paddle») өңдейді. Paddle — Voicy Pro жазылымдарының Merchant of Record-ы (ресми сатушысы) және қайта сатушысы: ол төлемді, қолданылатын салықтарды (ҚҚС немесе сатудан алынатын салық сияқты), шот-фактураларды және қаражатты қайтаруды өңдейді. Сатып алуыңызға осы Шарттармен қатар Paddle-дың Сатып алушыға арналған шарттары (Buyer Terms) қолданылады. Төлем бетінде көрсетілген бағаларға заң талап ететін жағдайларда қолданылатын салықтар кіреді.

3.3. Біз сіздің карта деректеріңізді алмаймыз және сақтамаймыз. Оларды тікелей Paddle өңдейді.

3.4. Автоматты ұзарту. Жазылымдар сіз оны тоқтатқанға дейін әр төлем кезеңінің соңында сол кездегі баға бойынша автоматты түрде ұзартылады. Баға, төлем кезеңі және автоматты ұзарту фактісі бірінші төлем алдында сізге көрсетіледі және сіз оларды растауыңыз тиіс. Жылдық тарифтер бойынша біз ұзартудан кемінде 15 күн бұрын Ботта хабарлама арқылы еске саламыз.

3.5. Автоматты ұзартуды кез келген уақытта тоқтата аласыз:

• Ботта: /pro → Voicy Pro → Автоматты ұзартуды тоқтату;
• Paddle жіберген түбіртек хатындағы сілтеме арқылы;
• @let_support немесе hello@voicy.bot арқылы қолдау қызметіне жүгініп.

Тоқтатқаннан кейін төленген кезеңнің соңына дейін қолжетімділік сақталады және бұдан әрі ақы алынбайды.

3.6. Біз бағаларды өзгертуге құқылымыз. Жаңа баға келесі ұзартуға қолданылардан кемінде 7 күн бұрын бұл туралы Ботта хабарлаймыз. Бағаның өзгеруі бұрын төленген кезеңдерге әсер етпейді. Жаңа бағамен келіспесеңіз, ұзартуға дейін жазылымды тоқтата аласыз.

4. Бас тарту және қаражатты қайтару

4.1. Шарттан бас тарту құқығы (ЕО, ЕЭА және Ұлыбритания тұтынушылары). Егер сіз ЕО, ЕЭА немесе Ұлыбританиядағы тұтынушы болсаңыз, сатып алған күннен бастап 14 күн ішінде себебін көрсетпестен жазылымнан бас тартуға құқығыңыз бар.

4.2. Төлем алдында сізден Voicy Pro-ға дереу қол жеткізуді сұрайтыныңызды және қызмет толық көрсетілгеннен кейін бас тарту құқығынан айырылатыныңызды мойындайтыныңызды растау сұралады. Осы растауды бергеннен кейін 14 күндік мерзім ішінде бас тартсаңыз, сізге бұрын көрсетілген күндерге пропорционалды соманы шегергендегі қаражат қайтарылады.

4.3. Бас тарту мерзімінен тыс автоматты ұзартуды кез келген уақытта тоқтата аласыз. Еліңіздің заңнамасында өзгеше талап етілмесе, ағымдағы кезең үшін төлемдер 4.4-тармақта көрсетілген жағдайларды қоспағанда, қайтарылмайды.

4.4. Мына жағдайларда тиісті төлем кезеңі үшін қаражат толық қайтарылады:

• ақы қателікпен алынса (мысалы, қайталанған төлем немесе жазылым тоқтатылғаннан кейін алынған төлем);
• Сервис біздің кінәміз бойынша қатарынан 72 сағаттан астам қолжетімсіз болса. 9-бөлімде сипатталған оқиғалар біздің кінәміз болып саналмайды.

4.5. Қаражатты қайтаруды сұрау үшін @let_support-қа жүгініңіз, Боттағы /pro немесе /paysupport командасын пайдаланыңыз немесе hello@voicy.bot мекенжайына Telegram пайдаланушы атыңызды, төлем күні мен сомасын көрсетіп хат жазыңыз. Сондай-ақ түбіртектегі сілтеме арқылы қаражатты қайтаруды тікелей Paddle-дан сұрай аласыз. Қаражатты Paddle бастапқы төлем әдісіне қайтарады.

4.6. Осы Шарттардың ешбір ережесі тұтынушы ретіндегі міндетті заңды құқықтарыңызды шектемейді.

5. Сіздің Контентіңіз

5.1. Контентіңіз үшін сіз жауаптысыз. Сіз оны, оның ішінде үшінші тарап платформаларына сілтемелер бойынша Контентті, Сервиске жіберуге қажетті барлық құқықтар мен рұқсаттарыңыз бар екенін және мұның ешбір заңды немесе ешкімнің құқықтарын бұзбайтынын растайсыз.

5.2. Сервисті мынадай Контентті өңдеу немесе жасау үшін пайдалануға болмайды:

• үшінші тұлғалардың авторлық құқығын немесе өзге құқықтарын бұзатын;
• беруге заңды негізіңіз жоқ басқа адамдардың дербес деректерін қамтитын;
• заңсыз, зорлық-зомбылықты немесе терроризмді насихаттайтын немесе кәмелетке толмағандар қатысатын сексуалдық сипаттағы материалдарды қамтитын;
• біреуді қудалайтын, біреуге жала жабатын немесе біреуге қатысты өшпенділікті қоздыратын;
• зиянды бағдарламалық жасақтаманы қамтитын немесе Сервистің жұмысын бұзуға арналған.

5.3. Ерекше сезімтал деректерді (денсаулық туралы ақпарат, биометриялық деректер немесе дін, саяси көзқарастар не жыныстық өмір туралы ақпарат сияқты) жіберуден аулақ болыңыз. Контентіңізде мұндай деректер болса, оларды беруге заңды негіздің болуына сіз жауаптысыз. Біз дауыс арқылы адамдарды сәйкестендірмейміз.

5.4. Сіз бізге Контентіңізді тек сізге Сервисті ұсыну, Нәтижеңізді Құпиялылық саясатында сипатталғандай сақтау және техникалық ақауларды жою үшін пайдалануға тегін, айрықша емес, бүкіл әлем аумағында әрекет ететін лицензия бересіз.

5.5. Біз сіздің Контентіңізді немесе Нәтижеңізді ЖИ модельдерін оқыту үшін пайдаланбаймыз. Өз модельдерімізді тек өзімізге тиесілі немесе заңды түрде алынған деректерде оқытамыз.

5.6. Біз Контентті өз ЖИ моделіміз және OpenAI API арқылы өңдейміз. OpenAI-ға тек сұрауыңызды орындауға қажетті Контент жіберіледі. Telegram ID, пайдаланушы атыңыз, есіміңіз және телефон нөміріңіз жіберілмейді; сұраулар есептік жазбаңызбен тек біздің жүйелеріміздің ішінде ғана байланыстырылған техникалық идентификатор арқылы анықталады.

5.7. Заңда рұқсат етілген шекте сіз Контентіңізге байланысты үшінші тұлғалардың немесе мемлекеттік органдардың талаптарынан туындаған залалдарды бізге өтеуге келісесіз.

6. Нәтиже

6.1. Сіз бен біздің арамызда Контентіңіз негізінде жасалған Нәтиже, ол қандай да бір құқықтармен қорғалатын шекте, сізге тиесілі және бастапқы Контентке құқығыңыз болған жағдайда сіз оны кез келген заңды мақсатта, оның ішінде коммерциялық мақсатта пайдалана аласыз.

6.2. Inline режимінде қолжетімді дауыстық мемдер чаттарда жеке, коммерциялық емес пайдалануға арналған. Олардың негізіндегі аудиоға құқықтар иелерінде қалады.

6.3. Авторлық құқық туралы шағымдар. Егер Сервис арқылы қолжетімді контент (оның ішінде дауыстық мемдер) сіздің авторлық құқығыңызды немесе өзге құқықтарыңызды бұзады деп есептесеңіз, hello@voicy.bot мекенжайына мыналар көрсетілген хабарлама жіберіңіз: байланыс деректеріңіз; туындының және құқық бұзатын контенттің сипаттамасы; оның Сервисте қай жерде орналасқаны; пайдалануға рұқсат берілмегеніне адал сенетініңіз туралы мәлімдеме; хабарламадағы ақпараттың дұрыс екені және сіз құқық иесі немесе оның атынан әрекет етуге уәкілетті екеніңіз туралы мәлімдеме. Біз хабарламаларды жедел қараймыз, құқық бұзатын контентті жоямыз немесе оған қолжетімділікті бұғаттаймыз және құқықты бірнеше рет бұзған пайдаланушылардың қолжетімділігін тоқтата тұруымыз мүмкін.

7. Рұқсат етілген пайдалану

Мыналарға тыйым салынады:

• Сервисті көшіруге, өзгертуге, кері инженерияға ұшыратуға немесе декомпиляциялауға;
• біз рұқсат етпесе, Сервиске қол жеткізу үшін скрипттерді, боттарды немесе өзге автоматтандыру құралдарын пайдалануға;
• лимиттерді, тарифтерді немесе төлем жүйелерін айналып өтуге;
• Сервиске қолжетімділікті қайта сатуға немесе есептік жазбаңызды басқалармен бөлісуге;
• Сервисті бәсекелес өнім жасау үшін пайдалануға.

Осы Шарттарды бұзған жағдайда біз сіздің қолжетімділігіңізді шектеуге немесе тоқтата тұруға құқылымыз. Бұл жағдайда қаражатты қайтару 4-бөлімге сәйкес, бұзушылықтан келтірілген, құжатпен расталған залалды шегере отырып жүзеге асырылады.

8. ЖИ шектеулері және жауапкершілік

8.1. Сервис ықтималдық негізінде жұмыс істейтін ЖИ-ді пайдаланады. Нәтиже дәл емес немесе толық емес болуы мүмкін, ал Сервис «сол күйінде» және «қолжетімділік шегінде» ұсынылады.

8.2. Атап айтқанда, біз мыналар үшін жауап бермейміз:

• аудио сапасының төмендігінен, бөгде шудан, дауыстардың қабаттасуынан, акценттен немесе сөйлеу ақауларынан туындаған қателер;
• ЖИ «галлюцинациялары»: түйіндер мен аудармалардағы қате есімдер, күндер, сандар немесе фактілер;
• екпін немесе стиль жағынан сіздің күтуіңізге сай келмейтін түйіндер немесе аудармалар;
• үшінші тарап платформасы қолжетімділікті шектеген кезде сілтемелерді өңдей алмау.

8.3. Нәтиже заңгерлік, медициналық, қаржылық немесе өзге кәсіби кеңес болып табылмайды. Нәтижеге сүйенбес бұрын оны тексеріңіз.

8.4. Заңда рұқсат етілген шекте біздің сіз алдындағы жалпы жауапкершілігіміз талап қойылғанға дейінгі 3 ай ішінде сіз бізге төлеген сомамен шектеледі. Біз жанама немесе салдарлық залалдар үшін жауап бермейміз. Бұл шектеулер заң бойынша шектелуі мүмкін емес жауапкершілікке, оның ішінде абайсыздықтан болған өлім немесе денсаулыққа зиян келтіру, алаяқтық үшін жауапкершілікке, сондай-ақ тұтынушы ретіндегі міндетті құқықтарыңызға қолданылмайды.

9. Біздің бақылауымыздан тыс оқиғалар

Біз өзіміздің ақылға қонымды бақылауымыздан тыс оқиғалардан, оның ішінде Telegram-ның істен шығуы немесе бұғатталуы, бізге байланысты емес себептермен үшінші тарап API-ларына қолжетімділіктің жоғалуы, төлем провайдерлерінің ақаулары, санкциялар және мемлекеттік органдардың әрекеттері салдарынан туындаған іркілістер үшін жауап бермейміз.

10. Осы Шарттарға өзгерістер енгізу

Біз осы Шарттарды жаңартуға құқылымыз. Елеулі өзгерістер күшіне енгенге дейін кемінде 7 күн бұрын бұл туралы Ботта хабарлаймыз. Осыдан кейін Сервисті пайдалануды жалғастыру жаңартылған Шарттарды қабылдағаныңызды білдіреді. Келіспесеңіз, Сервисті пайдалануды тоқтатып, жазылымыңыздан бас тарта аласыз.

11. Қолданылатын құқық және дауларды шешу

11.1. Осы Шарттар Қазақстан Республикасының заңнамасымен реттеледі.

11.2. Алдымен hello@voicy.bot мекенжайы бойынша бізге хабарласыңыз. Біз кез келген шағымды 10 күн ішінде шешуге тырысамыз.

11.3. Даулар Қазақстан, Астана қаласының соттарында шешіледі. Егер сіз тұтынушы болсаңыз, тұрғылықты еліңіздің міндетті заңнамасы беретін қорғау сізде сақталады және заң рұқсат еткен жағдайда жергілікті сотқа жүгіне аласыз.

12. Байланыс

AI Creator LLP (ТОО «AI Creator»)
Электрондық пошта: hello@voicy.bot
Telegram арқылы қолдау: @let_support

Құпиялылық саясаты

Соңғы жаңартылған күні: 2026 жылғы 6 қазан

1. Біз кімбіз

1.1. Осы Құпиялылық саясаты AI Creator LLP (ТОО «AI Creator») («біз») Voicy Telegram-боты @voicy («Сервис») пайдаланушыларының және voicy.bot сайтына кірушілердің дербес деректерін қалай өңдейтінін түсіндіреді.

1.2. Біз сіздің дербес деректеріңіздің бақылаушысымыз (controller). Байланыс: hello@voicy.bot, Telegram: @let_support.

1.3. Осы Саясат бүкіл әлемдегі барлық пайдаланушыларға қолданылады және ЕО мен Ұлыбританияның Деректерді қорғаудың жалпы регламентінің (GDPR), «Дербес деректер және оларды қорғау туралы» Қазақстан Республикасы Заңының және өзге қолданылатын заңнаманың талаптарына сай келетіндей әзірленген.

2. Біз өңдейтін деректер

• Telegram есептік жазбасының деректері: Telegram ID, пайдаланушы аты, Telegram-да көрсетілген аты мен тегі, интерфейс тілі.
• Пайдалану деректері: тариф, жазылым мәртебесі, сұраулар тарихы, сұраулардың күні мен уақыты, сұраулардың техникалық идентификаторлары.
• Paddle-дан алынатын төлем деректері: төлемдердің сомасы, күні, мәртебесі және идентификаторы, жазылым тарифі, ел және электрондық пошта мекенжайы. Біз карта деректерін алмаймыз.
• Контент және Нәтиже: дауыстық хабарлар, аудио және бейне файлдар, суреттер, сілтемелер, сондай-ақ олардың негізінде жасалған транскрипттер, түйіндер, аудармалар және өзге нәтижелер. Контентте сіз және басқа адамдар туралы дербес деректер, оның ішінде дауыстар болуы мүмкін.
• Қолдау қызметіне жіберілген хабарлар.
• Сайтқа кірушілер (voicy.bot): IP мекенжайы, сұраудың күні мен уақыты, бет мекенжайы және браузер туралы мәліметтер (веб-сервер журналдары); сондай-ақ Yandex Metrica жинайтын деректер (Cookie файлдары саясатын қараңыз).

Біз дауыс арқылы адамдарды сәйкестендірмейміз, сондықтан дауысты биометриялық деректер ретінде өңдемейміз.

3. Деректеріңізді не үшін және қандай құқықтық негізде өңдейміз

• Сервисті ұсыну, Контентіңізді өңдеу және Нәтижені беру — сізбен жасалған шартты орындау (GDPR 6-бабының 1(b)-тармағы).
• Төлемдерді қабылдау, жазылымдар мен қаражатты қайтаруды басқару — шартты орындау (6-баптың 1(b)-тармағы) және салық пен бухгалтерлік есеп сияқты заңнамалық міндеттер (6-баптың 1(c)-тармағы).
• Қолдау қызметіне келген сұраулар мен шағымдарға жауап беру — шартты орындау (6-баптың 1(b)-тармағы).
• Сіз жіберген Контенттегі басқа адамдардың дербес деректерін (мысалы, жазбадағы басқа сөйлеушілердің дауыстарын) өңдеу — сіз сұраған Сервисті ұсынудағы біздің заңды мүддеміз (6-баптың 1(f)-тармағы). Біздің Шарттарымызға сәйкес сіз мұндай Контентті беруге құқығыңыз бар екенін растайсыз. Біз оны тек сұрауыңызды орындау үшін өңдейміз және 6-бөлімде белгіленген мерзімдерде жоямыз.
• Сервис пен сайттың қауіпсіздігін қамтамасыз ету, теріс пайдаланудың алдын алу және қателерді түзету — біздің заңды мүдделеріміз (6-баптың 1(f)-тармағы).
• Yandex Metrica арқылы voicy.bot сайтына кірулерді және жарнамамыздың тиімділігін өлшеу — cookie туралы хабарламадан кейін сайтты пайдалану арқылы берілген келісіміңіз (6-баптың 1(a)-тармағы). Оны кез келген уақытта cookie туралы хабарламадағы «Бас тарту» батырмасы арқылы немесе браузер баптауларында кері қайтарып ала аласыз.
• Шарттарды қабылдағаныңыз және төлем алдында дереу қол жеткізуді растағаныңыз туралы жазбаларды сақтау — заңнамалық міндеттер және біздің заңды мүдделеріміз (6-баптың 1(c) және 1(f)-тармақтары).
• Қызметтік хабарламалар жіберу (бағаның өзгеруі, ұзарту туралы еске салу, Шарттардың жаңартылуы) — шартты орындау және заңнамалық міндеттер.

Біз Контентіңізді немесе Нәтижеңізді ЖИ модельдерін оқыту үшін пайдаланбаймыз, сондай-ақ дербес деректеріңізді сатпаймыз және жарнама мақсатында бермейміз.

4. Деректерді кімге береміз

• OpenAI, L.L.C. (АҚШ) — біздің өңдеушіміз ретінде Контентті ЖИ арқылы өңдеу.
• Қазақстандағы хостинг провайдерлері — біздің өңдеушілеріміз ретінде дерекқорымыз бен өз ЖИ моделімізге арналған серверлер.
• Ресейдегі хостинг провайдері — біздің өңдеушіміз ретінде voicy.bot сайтының серверлері.
• YANDEX LLC (Ресей) — біздің өңдеушіміз ретінде voicy.bot сайтындағы веб-аналитика (Yandex Metrica).
• Paddle — төлемдер, салықтар, шот-фактуралар және қаражатты қайтару. Paddle Merchant of Record ретінде және өзінің құпиялылық туралы хабарламасына сәйкес тәуелсіз бақылаушы ретінде әрекет етеді.
• Telegram — Сервиске қол жеткізу үшін сіз пайдаланатын платформа. Telegram деректеріңізді өзінің құпиялылық саясатына сәйкес тәуелсіз бақылаушы ретінде өңдейді.
• Мемлекеттік органдар — заңда талап етілген жағдайларда.

OpenAI-ға тек сұрауыңызды орындауға қажетті Контент жіберіледі. Telegram ID, пайдаланушы атыңыз, есіміңіз және телефон нөміріңіз жіберілмейді; сұраулар есептік жазбаңызбен тек біздің жүйелеріміздің ішінде ғана байланыстырылған техникалық идентификатор арқылы анықталады.

5. Деректерді трансшекаралық беру

Деректеріңіз еліңізден тыс жерлерде, атап айтқанда біздің серверлеріміз, дерекқорымыз және өз ЖИ моделіміз орналасқан Қазақстанда, Америка Құрама Штаттарында (OpenAI), сондай-ақ voicy.bot сайты орналастырылған және YANDEX LLC (Yandex Metrica) тіркелген Ресейде өңделуі мүмкін. ЕО, ЕЭА немесе Ұлыбританиядан деректер қорғаудың тиісті деңгейі туралы шешім (adequacy decision) қабылданбаған елдерге берілген кезде біз Еуропалық комиссияның Стандартты шарттық ережелеріне (және Ұлыбританияның Қосымшасына) сүйенеміз және деректерді азайту, бүркеншіктеу (псевдонимдеу) және беру кезінде шифрлау сияқты қосымша қорғау шараларын қолданамыз.

6. Деректерді қанша уақыт сақтаймыз

• Бастапқы аудио және бейне файлдар — өңделгеннен кейін, бірақ жүктелгеннен кейін 24 сағаттан кешіктірілмей жойылады.
• Нәтиже (транскрипттер, түйіндер, аудармалар, файлдар) — жасалған сәттен бастап 30 күнге дейін немесе сіз оны жойғанға дейін.
• Есептік жазба деректері және жазылым тарихы — Сервисті пайдаланып жүрген уақыт бойы және есептік жазбаңызды жойғаннан кейін 30 күн.
• Төлем жазбалары — 5 жыл немесе салық және бухгалтерлік есеп заңнамасы талап етсе, одан ұзағырақ.
• Қолдау қызметіне жіберілген хабарлар — соңғы хабардан кейін 1 жыл.
• Сайт серверінің журналдары — толған сайын автоматты түрде қайта жазылады.
• Yandex Metrica деректері — келісіміңізді кері қайтарып алғанға дейін.
• Cookie файлдарына берілген келісімдер мен оларды кері қайтарып алу туралы жазбалар — келісімді дәлелдей алу үшін 3 жыл.

Осы мерзімдер өткеннен кейін деректер жойылады немесе иесіздендіріледі.

7. Сіздің құқықтарыңыз

Сіздің мына құқықтарыңыз бар:

• дербес деректеріңізге қол жеткізу және олардың көшірмесін алу;
• дұрыс емес деректерді түзету;
• деректеріңізді жою;
• өңдеуді шектеу немесе оған, оның ішінде заңды мүдделерге негізделген өңдеуге қарсылық білдіру;
• деректерді тасымалдау;
• өңдеу келісімге негізделген жағдайда келісімді кері қайтарып алу;
• Боттағы сұраулар тарихыңыз бен Нәтижені жою;
• еліңіздегі дербес деректерді қорғау жөніндегі уәкілетті органға шағым беру.

Құқықтарыңызды іске асыру үшін hello@voicy.bot немесе @let_support арқылы хабарласыңыз. Біз бір ай ішінде жауап береміз; күрделі сұраулар бойынша бұл мерзім тағы екі айға ұзартылуы мүмкін, бұл жағдайда біз себебін хабарлаймыз.

Калифорния тұрғындары үшін: біз дербес ақпаратты сатпаймыз және оны контекстаралық мінез-құлықтық жарнама үшін бермейміз.

8. Балалар

Сервис 18 жасқа толмаған адамдарға арналмаған. Біз балалардың деректерін біле тұра жинамаймыз. Егер бала Сервисті пайдаланды деп есептесеңіз, бізге хабарласыңыз, біз деректерді жоямыз.

9. Қауіпсіздік

Біз деректеріңізді қорғау үшін техникалық және ұйымдастырушылық шараларды қолданамыз, оның ішінде беру кезінде шифрлау (TLS), қолжетімділікті бақылау және аутентификация, ЖИ провайдерлеріне жіберілетін сұрауларды бүркеншіктеу, өңдегеннен кейін бастапқы файлдарды автоматты түрде жою, сақтық көшірмелер жасау және қолжетімділікті журналға тіркеу. Егер деректердің жылыстауы сіздің құқықтарыңызға қатер төндіруі ықтимал болса, біз бұл туралы тиісті уәкілетті органға және талап етілген жағдайда сізге хабарлаймыз.

10. Өзгерістер

Біз осы Саясатты жаңартуға құқылымыз. Елеулі өзгерістер туралы Ботта хабарлаймыз. Өзекті нұсқасы әрдайым voicy.bot сайтында және Бот мәзірінде қолжетімді.

11. Байланыс

AI Creator LLP (ТОО «AI Creator»)
Электрондық пошта: hello@voicy.bot
Telegram арқылы қолдау: @let_support

Cookie файлдары саясаты

Соңғы жаңартылған күні: 2026 жылғы 6 қазан

Осы саясат voicy.bot сайты қандай cookie файлдарын және ұқсас технологияларды (localStorage, sessionStorage) пайдаланатынын, оларды не үшін пайдаланатынын және олардан қалай бас тартуға болатынын түсіндіреді. Cookie файлдары — сайт браузеріңізде сақтайтын шағын мәтіндік файлдар.

1. Міндетті

Олар келісімсіз жұмыс істейді және ешкімге берілмейді:

• voicyConsent (localStorage) — хабарлама әр бетте көрсетілмеуі үшін cookie туралы хабарламаны қабылдағаныңызды (және осы саясаттың нұсқасын) немесе Metrica-ны өшіргеніңізді есте сақтайды. Келісім 12 ай сақталады, Metrica-ны өшіру — мерзімсіз.
• fromDirect (sessionStorage) — Yandex Direct жарнамасынан келгеніңізді белгілейді, сондықтан Voicy ботын ашатын батырмалар бот іске қосылғанда осы белгіні береді. Қойынды жабылғанға дейін сақталады; браузеріңізден тек бот сілтемесінде ғана, сіз оны басқан кезде шығады.
• voicy_metrika (voicy.bot доменіндегі cookie) — Yandex Metrica бойынша таңдауыңызды есте сақтайды, сондықтан ол сайтта да, app.voicy.bot жеке кабинетінде де қолданылады. Бас тарту 400 күн, қабылданған хабарлама 12 ай сақталады.
• voicy_theme (voicy.bot доменіндегі cookie) — сайт пен кабинет үшін ашық немесе қараңғы тақырыпты есте сақтайды. 12 ай сақталады.
• voicySignedIn (localStorage) — «Кабинетімді ашу» батырмасын бірден көрсету үшін есептік жазбаңыздың аты, суреті және Pro белгісі. Жүйеден шыққанға дейін браузеріңізде сақталады.

2. Аналитика (Yandex Metrica)

Сайтқа кірген кезде орнатылады; алғаш кіргенде сайт cookie туралы хабарлама көрсетеді. Yandex Metrica веб-аналитика сервисі кірулерді санайды, келушілердің сайтты қалай пайдаланатынын көрсетеді (оның ішінде Webvisor деп аталатын сеанс жазбалары) және жарнамамыздың тиімділігін өлшеуге көмектеседі. Ол IP мекенжайыңызды, cookie және браузер идентификаторларын, құрылғы, операциялық жүйе және браузер туралы мәліметтерді, келу көзін және сайттағы әрекеттеріңізді өңдейді. Құқықтық негіз: сіздің келісіміңіз (GDPR 6-бабының 1(a)-тармағы). Бұл деректерді біздің атымыздан Ресейдегі YANDEX LLC компаниясы өңдейді, сондықтан деректер Ресейге беріледі. Сайт доменіндегі Metrica-ның негізгі cookie файлдары:

• _ym_uid — келушілерді ажыратады; 1 жыл;
• _ym_d — алғашқы кіру күні; 1 жыл;
• _ym_ucs, _ym_fa — келушінің техникалық идентификаторлары; 1 жыл;
• _ym_isad — жарнама бұғаттағыштарын анықтайды; 20 сағат;
• _ym_visorc — сеансты жазу (Webvisor); 30 минут;
• _ym_metrika_enabled — Metrica cookie файлдарының орнатылғанын тексереді; 60 минут;
• _ym_hostIndex — Metrica-ға жіберілетін сұраулар санын шектейді; 1 күн.

Metrica сондай-ақ localStorage-те техникалық жазбаларды («_ym» деп басталатын кілттерді) сақтайды және Yandex басқаратын Yandex домендеріндегі cookie файлдарын (yandexuid, i, yabs-sid және т.б.) пайдалануы мүмкін. Толық тізім Yandex Metrica анықтамасында берілген.

Сондай-ақ жарнамадан келген болсаңыз, жеке кабинетте тіркелуіңізді сол жарнамамен байланыстыру үшін сайт оның белгілерін (yclid және utm_*) voicy.bot доменіндегі cookie файлдарында сақтайды. Олар 90 күн сақталады және Yandex Metrica-дан бас тартқан болсаңыз, сақталмайды.

Біз әрбір келісім мен оны кері қайтарып алу туралы жазбаны (күні мен уақыты, IP мекенжайы, таңдау, саясат нұсқасы және браузер туралы мәліметтер) келісімді дәлелдей алу үшін 3 жыл сақтаймыз.

3. Қалай бас тартуға болады

• cookie туралы хабарламадағы «Бас тарту» батырмасын басыңыз: біз Metrica cookie файлдарын доменімізден жоямыз және осы браузерде есептегішті бұдан әрі жүктемейміз;
• браузер баптауларында cookie файлдарын жойыңыз немесе бұғаттаңыз;
• Yandex Metrica-дан бас тартуға арналған кеңейтуді орнатыңыз.

Аналитикалық cookie файлдарынан бас тарту сайтты пайдалануыңызды шектемейді. Толығырақ Құпиялылық саясатында. Сұрақтар бойынша: hello@voicy.bot немесе @let_support.